Tit 3 | BEF | STEP | Kai kagagu mine'ahana bona'i ya'ma kaga'a ma luto aku'i li kosaba huto ma luto lu epibo. Enali sipi kaba bo'ani to gamanimagi hiti agoya hu epelete ka'ani kehelilabe. Ya hilete enali'ani'mu hetofa foya'a fato fato'mofihi asaga'i ni'ina babahi hite lilabe.

Titus 3

Bati huto mino lito biluta kaga

1 Kai kagagu mine'ahana bona'i ya'ma kaga'a ma luto aku'i li kosaba huto ma luto lu epibo. Enali sipi kaba bo'ani to gamanimagi hiti agoya hu epelete ka'ani kehelilabe. Ya hilete enali'ani'mu hetofa foya'a fato fato'mofihi asaga'i ni'ina babahi hite lilabe. 2 To bonakamagi fato bona'i mone'mofihi kaga li sibina mehise to luba sabo mehise minalabe luto lu epibo. Enali legeso hite minete asaga bona'magitoga komopa'anigu keheli bati hite enele'mo babahi hilabe. 3 To laliti koyapa'i ana suhi huto mino'ohuta lali negi nagi noto minolata, ka keheli he'milata to keheli sibina hulata huto mino'ohuta yabe. To ya nohutogo lele'mo hapotili hilata hi'ahanamo ya hulototi libita hulata nohina nasanamofihi laga'a kehelilata foipa nasanamofihi agoya hu emito minoto bona'i enele'mo sibina hu epoloto bona'magi lolo hite melete hanana'mu ya suhi huto minose ni'inaya ya luto lulototi siko hulata hu'ohutamo ni'ibe. Ya nohutogo lali kumu keheli sibina nehago enali lipakafa lahago lali enipakafa enohonogo hulata hu'ohutamo ni'ibe. 4 Ya huto nohutogo alihi ya'ma lamana hulata bo, Hu'mau ai lele'mo hetofa hu'ehina'a to mehi limi'ehina'a li huto huloto lubuto bi'ehinamo ni'ibe. Lali fotogo huto minoto lito hu'ohutanalo lele'mo bati hu'ehina ni'ifihe? Ya huto meni'ibe. Ginaga fi limito lubuto bi'ehina ni'ibe. To hiya huto lubuto bi'ehibe? Ai hetofa Sikalafu'uba komopatigu okala hu letoloto, lele'mo lamana hulata to lele'mo kosaba hulata higo mino lito buto mino'ohuta yabe. 6 Hu'mau ai'a lubuto bo Yesu Kilisitohi aitogati hetofa Sikalafu'i lalitoga ho lifigo sipi huto lele'mo hetofa hu'ehina. 7 Ya higo Yesuhi lehe'mose nasana'auba Hu'mamofihi bulo lele'mo bebe sose'namu to lali minoba minoba huse'namu fifa ilata nohutamofihi lilabe luto ya hu leto'ehinamo ni'ibe. 8 Kaga ya'ma lamana'a lusiga luto ni'ibe.

Ka'a ya'ma le'mo hofa toloto lu epilane luto nolube. Ya huletogo Hu'mamofi kumu keheli amuya nemalana bona'magi enali nasana lamana'a lilune lite nelinogo foya babu lite nelite lilabe. Nasana lamana'a ni'ibe lite ye hilenogo bona'i enele'mo bati hilinamo ni'ibe. 9 Laga mehina kaga lite li muyalo malo hite minelata nehana yamofihi he'milo. To enigiko enagako ema'aga bona'i tili tele hite minete lite ti'ahananamofihi ka'a to kenasabo bite minalana keya ka lu'ehina'mu luba sabo hilana yamofihi he'milo luto'ni bonakamagihi yana lu epibo. Yamofihi ana kaga futu'a nina, gusunupa'a meni'ibe. Ana kaga keheli he'mito kemegesa hu emibo. 10 Bona'i luga'amagi ka laga mehina'a nelinogo loko hilune lite nehinogo kana'a monekofi kana'a loefi enegekesa lito lipoti epiloto to mekehelinogomo enoho lifi he'minogo enali'anisigo minalabe. 11 Kai ya'ma keheli'ahane. Bona'i ya hana'amagihi pelesa ilata nehana bona'i komopa'ani hekini lago minete enali'ani minete lite nasana yauba enali hapa'ani huto hu'ehina.

Kaga anasi asu halina

12 Nani Atemasigo Tikikugo etali neha'inaga kaitoga mone ho lifinogo'ni nehetilenogo yamofihi Nikopoli hepatoga nohiluna'mu yabe. Nanitoga alube luto ka amuya molobo. Nani ana huto ana hepatoga yasi hilina kanagu minalube luto lu keheli'ohube. 13 Bo loemo Apolosi hiti to ka foya lilata nohinamofihi hapa'a nokehelina bo, Yenasigi etali mono foyalo bila'ibe lite nose'na'atiti fe'noha'atiti li bati hila'ibe luto amuya molobo. Ya etehe'metogo etali ana'ina'mu sa sa mehise nehite kapogu mele'isi bila'ibe. 14 To bonatimagi enali hetofa foya suhi hite lelite nebinogo komopa'ani lolo hilibe. Enali'ani yana foya'mu enogo'na bibo. To enugufamofihi ana'ina li emilata nehana yamofihi hi emite nebinogo mono kumu lolo hite melete nasanauba legeya'a li huto hilube'mu hibe. Enali fa'mene fuli minelata mehilo luto lu epibo.

15 Nani hiti nehana bona'i enali asaga'i nohapihe lite keke'i neli ketabe. To enali mono kamu'i kehelite enemehi limilata nehana bona'i nehafihe luto ka lu epito keke'i nolu epolone.

Hu'mamofihi lehe'mose'nauba lenalitoga mino moloto mineno.